កងរាជអាវុធហត្ថស្រុកសំពៅលូន ឃាត់ខ្លួនស្ត្រី៤នាក់ ក្រោយរក្សាទុកជួញដូរដោយខុសច្បាប់នូវសារធាតុញៀន

នៅវេលាម៉ោង ១១ថ្ងៃត្រង់ ថ្ងៃទី១៣ ខែកុម្ភៈ ឆ្នាំ២០២៥ កម្លាំងកងរាជអាវុធហត្ថស្រុកសំពៅលូន បានបើកប្រតិបត្តិការចុះបង្ក្រាបករណីរក្សាទុកជួញដូរដោយខុសច្បាប់សារធាតុញៀន នៅចំណុចផ្សារតាឡន ស្ថិតក្នុងភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង ឃាត់ខ្លួនជនសង្ស័យជាស្រ្តីចំនួន៤នាក់ រួមទាំងវត្ថុតាង គ្រឿងញៀនជាច្រើនកញ្ចក់។

ជនសង្ស័យទាំង៤នាក់រួមមាន៖ ១. ឈ្មោះ វ៉ន វុិ ភេទស្រី អាយុ១៨ឆ្នាំ មុខរបរមេផ្ទះ។ ២. ឈ្មោះ ចុក សុភាព ភេទស្រី អាយុ៤៤ឆ្នាំ មុខរបរមេផ្ទះ។ ៣.ឈ្មោះ ហេង ស្រីនួន ភេទស្រី អាយុ៣៤ឆ្នាំ មុខរបរមិនពិតប្រាកដ។ និង៤.ឈ្មេាះ សយ មាន់ ភេទស្រី អាយុ៥០ឆ្នាំ មុខរបរមិនពិតប្រាកដ។ ជនសង្ស័យទាំង ៤នាក់ រស់នៅភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង។

កម្លាំងកងរាជអាវុធហត្ថបានដកហូត ថ្នាំញៀនប្រភេទទឹកកក (ice) ចំនួន ២២៧ កញ្ចប់ ទម្ងន់ ៤៩.៦ក្រាម ថ្នាំញៀនប្រភេទ យ៉ាម៉ា ចំនួន៤៣ គ្រាប់ និងទូរស័ព្ទដៃចំនួន ២គ្រឿង។

បច្ចុប្បន្ន ជនសង្ស័យរួមទាំងវត្ថុតាងត្រូវបានកម្លាំងជំនាញបញ្ជូនទៅបញ្ជាការដ្ឋានកងរាជអាវុធហត្ថខេត្តបាត់ដំបង ដើម្បីសួរនាំនិងចាត់ការតាមនីតិវិធីច្បាប់៕

ប្រភព៖ បាត់ដំបងប៉ុស្តិ៍