ព្រៃវែង ៖ អាចចាត់ទុកថាជាសំណាងផ្ទួនៗសម្រាប់យុវជនមួយរូប ដែលបានទើបប្រឡងមធ្យមសិក្សាទុតិយភូមិ២០២៣-២០២៤ កាលពីថ្មីៗនេះ ទទួលបានលទ្ធផលល្អស្ថិតក្នុងកម្រិតនិទ្ទេសA និងបន្ទាប់មកបានជាប់ចំណាត់ថ្នាក់លេខ១ ក្នុងកម្មវិធី “ប្រឡងជ្រើសរើសយុវជនឆ្នើម ផ្នែកចម្រៀង រដូវកាលទី៤ និងផ្នែកសម្រស់ រដូវកាលទី២ វគ្គផ្តាច់ព្រ័ត្រ” ដែលរៀបចំឡើងដោយ ក្រុមការងារអភិវឌ្ឍន៍យុវជនខេត្តព្រៃវែង កាលពីរសៀលថ្ងៃទី០២ ខែវិច្ឆិកា ឆ្នាំ២០២៤ នៅបរិវេណសួនសម្តេចក្រឡាហោម ស ខេង ខេត្តព្រៃវែង។
យុវជន ចាន់ លីតា ជ័យលាភីលេខ១ផ្នែកសម្រស់បុរសរដូវកាលទី២ បានទទួលប្រាក់រង្វាន់ពីកម្មវិធី នូវចំនួនទឹកប្រាក់១០០០ដុល្លារ និងម៉ូតូថ្មីស្រឡាងចំនួន០១គ្រឿង ដែលឧបត្ថម្ភដោយ ឯកឧត្តមអភិសន្តិបណ្ឌិត ស សុខា ប្រធានកិត្តិយសក្រុមការងារអភិវឌ្ឍយុវជនខេត្តព្រៃវែង និងលោកជំទាវ កែ សួនសុភី។
បន្ទាប់ពីទទួលបានជ័យលាភីនិងរង្វាន់រួចមក យុវជន ចាន់ លីតា បានសម្ដែងនូវក្ដីរំភើបរីករាយបំផុត ព្រោះបានសម្រេចនូវក្ដីបំណង ដែលកើតចេញពីការតស៊ូ និងកិច្ចខិតខំប្រឹងប្រែងទាំងការរៀនសូត្រ និងហ្វឹកហាត់ ខណៈដែលយុវជនរូបនេះ ជាយុវជនកំព្រា ទាំងឪពុកទាំងម្ដាយ ស្ថិតក្នុងត្រកូលមួយក្រខ្សត់បំផុត ត្រូវបានលោកយាយចិញ្ចឹមបីបាច់ថែរក្សានិងផ្គត់ផ្គង់ក្នុងការរៀនសូត្រតាំងពីតូច។
យុវជន ចាន់ លីតា បានបន្តថា ថ្វីត្បិតគាត់ស្ថិតក្នុងជីវភាពលំបាកខ្លាំងយ៉ាងណាក៏ដោយ ក៏ឆន្ទៈរបស់គាត់មិនបោះបង់ការសិក្សាជាដាច់ខាត។ ដោយសារស្ថានភាពជីវភាព កាន់តែរងនូវផលប៉ះពាល់ធ្ងន់ទៅៗ នៅក្នុងអំឡូងសកលលោក រួមនិងប្រទេសយើងផង ដោយសារជំងឺកូវីដ១៩ យុវជនរូបនេះធ្លាប់ផ្អាកការសិក្សាអស់រយៈពេល០២ឆ្នាំ ដើម្បីទៅធ្វើការងាររកប្រាក់ចិញ្ចឹមជីវិតនិងសន្សំបានប្រាក់ត្រឡប់មកសិក្សាវិញ។ ការងារនៅពេលនោះ ជាកម្មករសំណង់ និងជាអ្នករត់តុនៅ តាមភោជនីយដ្ឋានជាដើម។ ពេលត្រឡប់មកសិក្សាវិញ យុវជនរូបនេះបានប្រឈមខ្ពស់ ដោយការសិក្សាមិនទទួលបានលទ្ធផលល្អដូចសិស្សដទៃ ប៉ុន្តែឆន្ទៈនិងការតស៊ូ បានធ្វើឱ្យយុវជនរូបនេះកាន់តែប្រឹងសិក្សារហូតក្លាយជាសិស្សពូកែ និងបានប្រឡងជាប់បានលទ្ធផលនិទ្ទេសA។ ក្ដីស្រមៃរបស់យុវជន ចាន់ លីតា ចង់ក្លាយខ្លួនជាមន្រ្តីរាជការមួយរូបនាពេលអនាគត។
សូមជម្រាបថា កម្មពិធី “ប្រឡងជ្រើសរើសយុវជនឆ្នើម ផ្នែកចម្រៀង រដូវកាលទី៤ និងផ្នែកសម្រស់ រដូវកាលទី២ វគ្គផ្តាច់ព្រ័ត្រ” រៀបចំឡើងដោយ ក្រុមការងារអភិវឌ្ឍន៍យុវជនខេត្តព្រៃវែង ដែលមាន ឯកឧត្តម បណ្ឌិត ងិនបាណាល់ ជាប្រធានក្រុមការងារអភិវឌ្ឍខេត្តព្រៃវែង ក្រោមការឧបត្ថម្ភគាំទ្រដោយ ឯកឧត្តមអភិសន្តិបណ្ឌិត ស សុខា ប្រធានកិត្តិយសក្រុមការងារអភិវឌ្ឍយុវជនខេត្តព្រៃវែង និងលោកជំទាវ កែ សួនសុភី ក្នុងគោលបំណងផ្ដល់ឱកាសដល់យុវជន ដែលជាអនាគតទំពាំងស្នងឬស្សី បានបង្ហាញពីសមត្ថភាព ទេពកោសល្យ ភាពក្លាហាន បញ្ចេញសមត្ថភាពផ្នែកសិល្បៈរបស់ខ្លួនបន្ថែមពីលើការសិក្សារបស់យុវជនក្នុងខេត្តព្រៃវែង៕ ដោយ ៖ រាជសីហ៍០២
