សូមចុចSubscribe Channel Telegramដើម្បីទទួលបានព័ត៌មានថ្មីៗទាន់ចិត្ត
ភ្នំពេញ ៖ កម្ពុជា បានបដិសេធយ៉ាងដាច់ដាច់ខាត ចំពោះការចោទប្រកាន់គ្មានមូលដ្ឋានរបស់ភាគីថៃ ថា «កម្ពុជាដាក់មីនថ្មី» បន្ទាប់ពីទាហានថៃម្នាក់ទៀតហើយ បានដើរជាន់មីនដាច់ជើង នៅក្បែរប្រាសាទតាក្របី។
តាមរយៈសេចក្ដីថ្លែងការណ៍របស់ អាជ្ញាធរមីនកម្ពុជា ពាក់ព័ន្ធនឹងឧប្បត្តិហេតុផ្ទុះមីន កាលពីថ្ងៃទី២៧ ខែសីហា ឆ្នាំ២០២៥ នៅក្បែរប្រាសាទតាក្របី និងការចោទប្រកាន់ជាបន្តបន្ទាប់របស់យោធាថៃ។
អាជ្ញាធរមីន បញ្ជាក់ថា ក្នុងឧប្បត្តិហេតុខាងលើទាហានថៃម្នាក់ បានដើរជាន់មីននៅក្នុងតំបន់ព្រំដែន ហើយរងរបួសដាច់ប្រអប់ជើងខាងស្តាំ ហើយយោធាថៃបាន ចោទប្រកាន់ថា កម្ពុជាបានរំលោភលើបទឈប់បាញ់ និងអនុសញ្ញាអូតាវ៉ា ដោយកម្ពុជាបានដាក់មិនថ្មី ធ្វើពីប្លាស្ទិក ដែលមិនអាចរកឃើញដោយឧបករណ៍រាវមីនស្តង់ដារ។
អាជ្ញាធរមីន សម្តែងនូវការសោកស្តាយ ចំពោះទាហានដែលរងគ្រោះដោយសារមីន និងសូមជូនពរឱ្យជាសះស្បើយយ៉ាងឆាប់រហ័ស ក៏ប៉ុន្តែកម្ពុជាក៏សូមបដិសេធយ៉ាងដាច់ខាត ចំពោះការចោទប្រកាន់ដែលថា កម្ពុជាបានដាក់មីនថ្មី ដោយការចោទប្រកាន់នេះ មិនមានការស៊ើបអង្កេតត្រឹមត្រូវ ឬមានភស្តុតាងច្បាស់លាស់។ កម្ពុជា ប្តេជ្ញាគោរពតាមបទឈប់បាញ់ និងបានអនុវត្តកាតព្វកិច្ចរបស់ខ្លួន ក្នុងនាមជារដ្ឋភាគីអនុសញ្ញាអូតាវ៉ា ចាប់តាំងពីឆ្នាំ២០០០ ដោយដាច់ខាតមិនប្រើប្រាស់មីនប្រឆាំងមនុស្ស។ កម្ពុជាមិនបានប្រើប្រាស់ ផលិត ឬដាក់មិនថ្មីឡើយ ចាប់តាំងពីអនុសញ្ញាចូលជាធរមានសម្រាប់កម្ពុជា។
តំបន់ដែលឧប្បត្តិហេតុកើតឡើង ស្ថិតនៅតាមបណ្តោយព្រំដែនក្បែរប្រាសាទតាក្របី ដែលជាតំបន់មានមីនច្រើន បន្សល់ទុកពីសម័យសង្គ្រាម ជាច្រើនទសវត្សរ៍មកហើយ។ ក្នុងអំឡុងសង្គ្រាមស៊ីវិល និងរបបខ្មែរក្រហម មីនរាប់លានគ្រាប់ ត្រូវបានដាក់នៅភាគពាយ័ព្យនៃប្រទេសកម្ពុជា រួមទាំងមីនធ្វើពីផ្លាស្ទិកផងដែរ ដែលមីនប្រភេទនេះ មានសារធាតុលោហៈតិចតួចណាស់ ពិបាកក្នុងការរកឃើញដោយប្រើប្រាស់ឧបករណ៍រាវមីនស្តង់ដារ៕
សូមចុចSubscribe Channel Telegramដើម្បីទទួលបានព័ត៌មានថ្មីៗទាន់ចិត្ត