រសៀល ថ្ងៃអាទិត្យ ទី២៩ ខែមិថុនា ឆ្នាំ២០២៥ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង អញ្ជើញជាអធិបតីដ៏ខ្ពង់ខ្ពស់ក្នុងពិធីប្រកាសក្រុមការងាររាជរដ្ឋាភិបាលចុះមូលដ្ឋានស្រុកបាភ្នំ ខេត្តព្រៃវែង បានរៀបចំឡើងនៅសាលប្រជុំសាលាស្រុកបាភ្នំ ។
ពិធីនេះឯកឧត្ដមបណ្ឌិត ងិន បាណាល់ត្រូវបានតែងតាំងជាប្រធានក្រុមការងាររាជរដ្ឋាភិបាលចុះដ្ឋានស្រុកបាភ្នំ ដែលមានការចូលរួមពីថ្នាក់ដឹកនាំខេត្ត ស្រុក មន្ត្រីរាជការ កងកម្លាំងប្រដាប់អាវុធ និងសមាជិក សមាជិកា ចំនួន៥៩៦រូប ។
ការបង្កើតក្រុមការងាររាជរដ្ឋាភិបាលចុះមូលដ្ឋានស្រុកបាភ្នំ គឺជាយន្តការដ៏សំខាន់របស់រាជរដ្ឋាភិបាលនីតិកាលទី ៧ ដើម្បីធានាថា គោលនយោបាយនានារបស់រដ្ឋាភិបាល ត្រូវបានអនុវត្តប្រកបដោយប្រសិទ្ធភាពខ្ពស់ និងឆ្លើយតបចំតម្រូវការជាក់ស្តែងរបស់ប្រជាពលរដ្ឋនៅមូលដ្ឋាន។
ក្រុមការងារនេះមានភារកិច្ចចម្បងជាច្រើន រួមមាន៖ ចុះជួបប្រជាពលរដ្ឋផ្ទាល់ដល់មូលដ្ឋាន ដើម្បីស្តាប់នូវកង្វល់ សំណូមពរ និងបញ្ហាដែលប្រជាពលរដ្ឋកំពុងជួបប្រទះ ក៏ដូចជាស្វែងរកដំណោះស្រាយសមស្រប។ សម្របសម្រួលរដ្ឋបាលថ្នាក់ជាតិ ជាមួយនឹងរដ្ឋបាលថ្នាក់ក្រោមជាតិ តាមរយៈការធ្វើការយ៉ាងជិតស្និទ្ធជាមួយអាជ្ញាធរមូលដ្ឋានដើម្បីជំរុញគម្រោងអភិវឌ្ឍន៍តាមវិស័យនានា ដូចជាហេដ្ឋារចនាសម្ព័ន្ធ កសិកម្ម សុខាភិបាល និងអប់រំ ឲ្យបានឆាប់រហ័ស។
ពង្រឹងសេវាសាធារណ ត្រួតពិនិត្យ និងជួយកែលម្អការផ្តល់សេវាសាធារណៈនៅមូលដ្ឋានឲ្យមានប្រសិទ្ធភាព រួសរាយរាក់ទាក់ និងគ្មានអំពើពុករលួយ។
ផ្សព្វផ្សាយគោលនយោបាយ ព័ត៌មានអំពីគោលនយោបាយសំខាន់ៗរបស់រាជរដ្ឋាភិបាលឲ្យប្រជាពលរដ្ឋបានយល់ដឹងច្បាស់លាស់ ដើម្បីធានាថាពួកគាត់ទទួលបានអត្ថប្រយោជន៍ពេញលេញ។
ឯកឧត្តមអភិសន្តិបណ្ឌិត ស សុខា បានណែនាំដល់ ឯកឧត្តមបណ្ឌិត ងិន បាណាល់ ដែលត្រូវបានតែងតាំងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកបាភ្នំ ពីសារៈសំខាន់នៃការចុះមូលដ្ឋាន និងបានសង្កត់ធ្ងន់ថា ការចុះជួបប្រជាពលរដ្ឋផ្ទាល់ គឺជាគន្លឹះក្នុងការយល់ដឹងពីបញ្ហា និងផ្តល់ដំណោះស្រាយទាន់ពេលវេលា និងបានណែនាំដល់ក្រុមការងារទាំងអស់បន្តយកចិត្តទុកដាក់ខ្ពស់លើការងារស្នូលរបស់រដ្ឋបាលថ្នាក់ក្រោមជាតិ ដើម្បីធានាថាការផ្តល់សេវាសាធារណៈ និងការអភិវឌ្ឍនៅមូលដ្ឋានប្រព្រឹត្តទៅដោយរលូន និងមានប្រសិទ្ធភាពខ្ពស់។
ក្រុមការងារបានប្តេជ្ញាចិត្តក្នុងការបន្តអភិវឌ្ឍប្រទេសជាតិ លើកកម្ពស់ជីវភាពរស់នៅរបស់ប្រជាពលរដ្ឋ និងរក្សាបាននូវសន្តិភាព ស្ថិរភាពសង្គម និងសណ្តាប់ធ្នាប់សាធារណៈ ក្រោមការដឹកនាំរបស់រាជរដ្ឋាភិបាល សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា។
ឯកឧត្តមអភិសន្តិបណ្ឌិត ស សុខា ក៏បានជំរុញឲ្យក្រុមការងារទាំងអស់បន្តសហការគ្នាយ៉ាងជិតស្និទ្ធជាមួយអាជ្ញាធរដែនដី និងប្រជាពលរដ្ឋដើម្បីសម្រេចបាននូវគោលដៅរួម។
