ភ្នំពេញ ៖ លោក ម៉ុង ឫទ្ធី ប្រធានគណៈកម្មការទី៣ ព្រឹទ្ធសភា នៅថ្ងៃទី៣ ខែមិថុនា ឆ្នាំ២០២៥ បានស្នើដល់រាជរដ្ឋាភិបាល ពង្រឹងការត្រួតពិនិត្យគុណភាពជីកសិកម្មដែលនាំចូល, ពង្រឹងការនាំចូលពូជសត្វ និងពង្រឹងការនាំចូលពូជឈើហូបផ្លែផងដែរ ដើម្បីជៀសវាង កុំឱ្យកសិករយើងរងការខាតបង់។
ការស្នើរបស់ លោក ម៉ុង ឫទ្ធី ធ្វើឡើងនាឱកាសអញ្ជើញចូលរួមកិច្ចប្រជុំសមាជរដ្ឋសភា និងព្រឹទ្ធសភា លើកទី១ នៅវិមានរដ្ឋសភា នៅថ្ងៃទី៣ ខែមិថុនា ឆ្នាំ២០២៥ ក្រោមអធិបតីភាព សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានសមាជរដ្ឋសភា និងព្រឹទ្ធសភា។
លោក ម៉ុង ឫទ្ធី បានថ្លែងថា ការធ្វើកសិកម្មសំខាន់ត្រូវការ ជី ពូជ ទឹក ដីដែលមានជីជាតិ ប៉ុន្តែបើសិនជាដីមិនល្អ យើងអាចកែប្រែដីនោះ ឱ្យមានជីជាតិបាន ដោយប្រើប្រាស់ជី។
ពាក់ព័ន្ធបញ្ហាជីកសិកម្មនេះ លោក បានសំណូមពរដល់រាជរដ្ឋាភិបាល មេត្តាជួយត្រួតពិនិត្យគុណភាព ការនាំចូលជី ធ្វើយ៉ាងកុំឱ្យមានការនាំចូលជី ដែលគ្មានគុណភាព យកមកលក់ឱ្យកសិករ ធ្វើឱ្យពួកគាត់ប្រើប្រាស់ទទួលផលបានតិច តម្លៃផលិតខ្ពស់។
លោក ក៏បានស្នើឱ្យរាជរដ្ឋាភិបាល ពង្រឹងការត្រួតពិនិត្យការនាំចូលពូជសត្វ និងពូជឈើហូបផ្លៃ ពិសេសការនាំចូលពីប្រទេសជិតខាត ព្រោះថាពូជឈើហូបផ្លៃខ្លះ គេឈប់ប្រើទៅហើយ គេនាំចូលមកលក់ឱ្យកសិករយើង ដោយសារគេមិនចង់ឱ្យយើងទទួលបានទិន្នផលច្រើនទេ ដើម្បីគេអាចនាំចូលបន្លែផ្លែឈើរបស់គេមកលក់ឱ្យយើង៕
