ភ្នំពេញ ៖ លោក សុខ ផល រដ្ឋលេខាធិការក្រសួងមហាផ្ទៃ បានឲ្យដឹងថា រាជរដ្ឋាភិបាល ក្នុងអាណត្តិទី៧ សមត្ថកិច្ចរបស់ក្រសួងមហាផ្ទៃ បានចេញបង្ក្រាបទីតាំងបទល្មើសអនឡាញ ៤៧ករណី និងចាប់ខ្លួនជនបរទេស ៤៥សញ្ជាតិ ខណៈជនជាតិចិនមានចំនួនច្រើនជាងគេ។
ការលើកឡើងរបស់ លោក សុខ ផល នាឱកាសអញ្ជើញធ្វើសន្និសីទសារព័ត៌មាន ស្តីពីលទ្ធផលនៃកិច្ចខិតខំប្រឹងប្រែងរបស់ក្រសួងមហាផ្ទៃ ក្នុងការបង្ការ ទប់ស្កាត់ និងបង្ក្រាបបទល្មើសឆបោកតាមអនឡាញ និងអំពើជួញដូរមនុស្ស នៅថ្ងៃ៣០ ខែឧសភា ឆ្នាំ២០២៥។
លោក សុខ ផល បានគូសបញ្ជាក់ថា «គិតពីអាណត្តិទី៦ ដល់អាណត្តិទី៧ ដឹកនាំដោយ សម្តេចបវរធិបតី ហ៊ុន ម៉ាណែត នេះ គឺក្រសួងមហាផ្ទៃនេះ (គិតតែក្រសួងមហាផ្ទៃ) គឺយើងបង្ក្រាបបានទីតាំងបទល្មើស៤៧កន្លែងធំៗ មនុស្សសរុបជាង ២ម៉ឺននាក់ (២៣៩៩០នាក់)»។
លោក បន្ដថា ក្នុងនោះអាជ្ញាធរមានសមត្ថកិច្ចបានជួយសង្គ្រោះពលរដ្ឋរងគ្រោះ ចំនួន ៤៨៤០នាក់។
លោក រដ្ឋលេខាធិការ បន្ថែមថា ចំពោះការចាប់ឃាត់ខ្លួនទាំង ៤៥សញ្ជាតិនេះ គឺជនជាតិចិនមានចំនួនច្រើនជាងគេ៕
