ភ្នំពេញ ៖ ក្រសួងអប់រំ យុវជន និងកីឡា បានឱ្យដឹងថា បុគ្គលិកអប់រំណា ប្រើប្រាស់ទូរស័ព្ទដៃ ក្នុងមណ្ឌលកំណែ នឹងត្រូវទទួលខុសត្រូវ ចំពោះមុខច្បាប់ និងមិនអនុញ្ញាតឱ្យចូលរួមក្នុងដំណើរការប្រឡងជារៀងរហូត។
តាមរយៈសេចក្ដីណែនាំរបស់ ក្រសួងអប់រំ នៅថ្ងៃទ៣១ ខែសីហា ឆ្នាំ២០២៥ បានបញ្ជាក់ថា «ក្នុងគោលដៅធ្វើឱ្យការប្រឡងធានាបាននូវគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ក្រសួងអប់រំ យុវជន និងកីឡា សូមធ្វើការណែនាំចំពោះគណៈកម្មការនានាក្នុងដំណើរការកំណែនៃការប្រឡងសញ្ញាបត្រ មធ្យមសិក្សាទុតិយភូមិ សម័យប្រឡង៖ ២៨ សីហា ២០២៥ ដូចជា ៖ មិនត្រូវថត និងផ្សព្វផ្សាយប្រធានវិញ្ញាសា សន្លឹកកិច្ចការបេក្ខជន និងអត្រាកំណែតាមគ្រប់រូបភាព។ មិនត្រូវយកប្រធានវិញ្ញាសា និងអត្រាកំណែចេញពីមណ្ឌលកំណែ។
ក្រសួង បន្ដថា ត្រូវប្រគល់ជូនគណៈកម្មការកណ្តាលនៃមណ្ឌលកំណែនូវ៖ ប្រធានវិញ្ញាសា ក្រោយពេលធ្វើអត្រាកំណែចប់, អត្រាកំណែ នៅរៀងរាល់បញ្ចប់ការងារតាមពេល។
ក្រសួង គូសបញ្ជាក់ថា «ចំពោះបុគ្គលិកអប់រំ ដែលយកចូល និងប្រើប្រាស់ទូរស័ព្ទដៃនៅក្នុងមណ្ឌលកំណែ នឹងត្រូវទទួលខុសត្រូវ ចំពោះមុខច្បាប់ និងមិនអនុញ្ញាតឱ្យចូលរួមក្នុងដំណើរការប្រឡងជារៀងរហូត»។
ក្រសួង សង្ឃឹមថា គណៈកម្មការនានាក្នុងដំណើរការកំណែ នឹងអនុវត្តសេចក្តីណែនាំនេះ ឱ្យមានប្រសិទ្ធភាព និងប្រកបដោយស្មារតីទទួលខុសត្រូវខ្ពស់។
សូមរំលឹកថា នៅថ្ងៃទី៣០ ខែសីហា ឆ្នាំ២០២៥ ហឹបសន្លឹកកិច្ចការទាំងអស់របស់បេក្ខជន នៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៨ សីហា ២០២៥ ត្រូវបានដឹកពីបណ្ដាខេត្តមកដល់មណ្ឌលកំណែវិទ្យាល័យព្រះស៊ីសុវត្ថិ ព្រមទាំងត្រូវបានរក្សាទុកយ៉ាងត្រឹមត្រូវ និងសុវត្ថិភាព ក្រោមការត្រួតពិនិត្យយ៉ាងម៉ត់ចត់ ពីសំណាក់គណៈមេប្រយោគទូទាំងប្រទេសប្រចាំរាជធានី – ខេត្ត អប្បមាទទូទាំងប្រទេស និងអង្គភាពប្រឆាំងអំពើពុករលួយ៕
