ភ្នំពេញ ៖ លោកស្រី ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បានឱ្យដឹងថា កម្ពុជា បានស្នើប្រទេសម៉ាឡេស៊ីដែលជាប្រធានអាស៊ានឱ្យជួយអន្តរាគមន៍ ដើម្បីជំរុញឱ្យភាគីថៃឆាប់ប្រគល់យោធិនកម្ពុជាចំនួន ២០នាក់ មកកម្ពុជាវិញ ឱ្យបានឆាប់រហ័ស។
ប្រសាសន៍របស់ លោកស្រី ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ ធ្វើឡើងនៅក្នុងសេចក្តីសង្ខេបព័ត៌មាន ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅព្រឹកថ្ងៃសុក្រ ទី០១ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។
អ្នកនាំពាក្យ បន្ដទៀតថា បច្ចុប្បន្នកងទ័ពកម្ពុជាចំនួន២០នាក់ដែលកំពុងស្ថិតនៅក្រោមការគ្រប់គ្រងរបស់ថៃមានសុវត្ថិភាព ហើយកម្ពុជាជំរុញភាគីថៃឱ្យបញ្ជូនពួកគេត្រលប់មកកម្ពុជាវិញឱ្យបានឆាប់រហ័ស្របតាមច្បាប់មនុស្សធម៌អន្តរជាតិ។
សូមរំលឹកថា បើតាមមេបញ្ជាការសឹករងប្រចាំខេត្តព្រះវិហារ លោក ច័ន្ទ សុភ័ក្រា បានប្រាប់ទៅកាន់បណ្ដាអនុព័ន្ធយោធាមកពីប្រទេសចំនួន១៣ ដែលចុះពិនិត្យស្ថានភាពពិតតាមព្រំដែន នៅថ្ងៃទី២៨ កក្កដា ថា ស្របពេលកម្ពុជាអត់ធ្មត់ កំពុងអនុវត្តបទឈប់បាញ់ កងទ័ពថៃ បានប្រើល្បិចហៅកងទ័ពកម្ពុជាទៅចាប់ដៃ និងភ្ជង់ព័ទ្ធចាប់កងកម្លាំង ២០រូប នៅទិសជាំតែ ប៉ុន្តែមានម្នាក់បានរត់រួចខ្លួន ហើយបានរាយការណ៍មកថា សង្ស័យថៃបាញ់សម្លាប់កម្លាំង២នាក់ទៀត៕
