ភ្នំពេញ ៖ លោកស្រី ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បានមានប្រសាសន៍ថា ទាក់ទងទៅនឹងជម្លោះប្រដាប់អាវុធរវាងកម្ពុជា-ថៃដែលបានបញ្ចប់កាលពីប៉ុន្មានថ្ងៃមកនេះ សបញ្ជាក់ថា សង្គ្រាមនឹងត្រូវបានបញ្ចប់ ជំនួសមកវិញដោយសុខសន្តិភាព ខណៈលទ្ធផលនៃការអនុវត្តនូវកិច្ចព្រមព្រៀងបទឈប់បាញ់រវាងកងទ័ពកម្ពុជា-ថៃបានវិវឌ្ឍន៍យ៉ាងជោគជ័យជាជំហានៗគួរឲ្យកត់សម្គាល់ ។
ក្នុងសន្និសីទសារព័ត៌មានសង្ខេបព័ត៌មានប្រចាំថ្ងៃ ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នាថ្ងៃ៣១ កក្កដា លោកស្រី ម៉ាលី សុជាតាបានថ្លែងថា កងទ័ពកម្ពុជា-ថៃបានគោរពនិងអនុវត្តនូវកិច្ចព្រមព្រៀងបទឈប់បាញ់ដែលបានចូលជាធរមាន នារាត្រីថ្ងៃ២៨ កក្កដាបានយ៉ាងល្អប្រសើរ។ ទន្ទឹមនឹងនេះបណ្តាមេភូមិភាគរវាងកម្ពុជា-ថៃក៏បានជួបប្រជុំគ្នាជាបន្តបន្ទាប់ ដើម្បីអនុវត្តតាមព្រមព្រៀងបទឈប់បាញ់ ។
លោកស្រីបញ្ជាក់ថា “លទ្ធផលជាវិជ្ជមានមួយចំនួនដែលយើងទទួលបានពីបទឈប់បាញ់ ចូលជាធរមាន យើងឃើញថា សកម្មភាពជាជំហានៗបានវិវឌ្ឍន៍ទៅគឺបានទទួលនូវកិច្ចព្រមព្រៀងឈប់បាញ់ ទទួលបានជោគជ័យជាជំហានថា ធានាថា សង្គ្រាមនឹងត្រូវបញ្ចប់ ជំនួសមកវិញដោយសុខសន្តិភាព” ។
លោកស្រីបន្តថា ប្រទេសម៉ាឡេស៊ីដែលជាប្រធានកិច្ចប្រជុំសម្របសម្រួលបទឈប់បាញ់ក៏បានបញ្ជូនគណៈប្រតិភូ អគ្គមេបញ្ជាការម៉ាឡេស៊ីមកកម្ពុជាដោយបានចុះទៅដល់បន្ទាត់ព្រំដែនកម្ពុជា-ថៃផងដែរ ។ ជាមួយគ្នានេះដែរ ភាគីកម្ពុជា-ថៃក៏បានកំណត់កិច្ចប្រជុំគណៈកម្មការព្រំដែនទូទៅ(GBC) នាថ្ងៃ៤ សីហា ខាងមុខ។
អ្នកនាំពាក្យបន្ថែមថា ជំហានទាំងអស់នេះហើយបានសបញ្ជាក់យ៉ាងច្បាស់ៗថា កម្ពុជាបានអនុវត្តនូវកិច្ចព្រមព្រៀងបទឈប់បាញ់យ៉ាងពេញលេញនិងម៉ត់ចត់បំផុត៕
