សម្តេចធិបតី ហ៊ុន ម៉ាណែត បានសរសេរសារខ្លីចំនុច៥ចំនុច ដើម្បីរំលឹកទៅភាគីថៃ ដោយក្នុងនោះសម្តេចធិបតី ក៏បានផ្ដាំទៅកាន់ភាគីថៃដែរថា វិធីសាស្រ្តបៀមឈាមព្រួសដាក់អ្នកដទៃ មិនមែនជាវិធីសាស្រ្តដែលមានសីលធម៌និងសុច្ចរិតភាពនោះទេ។
សម្តេចលើកឡើងបែបនេះ បន្ទាប់បីសម្តេចបានឃើញថ្នាក់ដឹកនាំនយោបាយ កងទ័ព និងបណ្ដាញសារព័ត៌មានថៃ បានធ្វើការចោទប្រកាន់ដោយគ្មានមូលដ្ឋានមកលើកម្ពុជាពាក់ព័ន្ធនឹងបញ្ហាមួយចំនួនដូចជាលូកដៃចូលនយោបាយផ្ទៃក្នុងថៃ ការដាក់មីន ព្រមទាំងបានធ្វើការគម្រាមដាក់ចេញនូវវិធានការជាឯកតោភាគីនៅក្នុងតំបន់ដែលមានវិវាទ រួមមានតំបន់មុំបី និងប្រាសាទតាមាន់ធំ ។ល។
សម្តេចបានលើកឡើងថា មិនមានការចាំបាច់ធ្វើការអត្ថាធិប្បាយអ្វីបន្ថែមច្រើននោះទេ ប៉ុន្តែសម្តេចគ្រាន់តែចង់ផ្ញើសារខ្លីប៉ុន្មានចំណុចតែប៉ុណ្ណោះដើម្បីរំលឹកទៅភាគីថៃដូចជា៖
១. តំបន់ឬទីកន្លែងដែលមានវិវាទ ឬមិនទាន់ដាច់ស្រេចថាស្ថិតក្នុងដែនអធិបតេយ្យភាពរបស់ប្រទេសណាមួយ គឺគ្មានភាគីណាមានសិទ្ធិធ្វើសកម្មភាពឬដាក់ចេញនូវវិធានការជាឯកតោភាគីនៅក្នុងតំបន់ឬទីកន្លែងនោះ។ រាល់វិធានការនានាដែលអាចអនុវត្តបាន ត្រូវមានការឯកភាពគ្នារវាងភាគីទាំងពីរជាមុនសិន។
២. បន្ទាត់ក្រហមនៅតែជាបន្ទាត់ក្រហម មិនមានការប្រែប្រួលទេ។ សូមកុំបំពាន។
៣. កម្ពុជាមិនរំលោភបំពានលើអ្នកណាទេ ប៉ុន្តែកម្ពុជាក៏មិនឲ្យអ្នកណាមួយរំលោភបំពានលើខ្លួននោះដែរ។ កម្ពុជាមានសមត្ថភាពគ្រប់គ្រាន់និងបានត្រៀមខ្លួនជាស្រេចក្នុងការការពារខ្លួននិងការពារបូរណភាពទឹកដី តាមគ្រប់មធ្យោបាយទាំងអស់ប្រឆាំងនឹងការរំលោភបំពាន។
៤. វិធីសាស្រ្តបៀមឈាមព្រួសដាក់អ្នកដទៃ មិនមែនជាវិធីសាស្រ្តដែលមានសីលធម៌និងសុច្ចរិតភាពនោះទេ។ វិធីសាស្ត្របែបនេះមិនត្រូវប្រើទេ បើយើងពិតជាចង់កសាងនូវទំនុកចិត្តរវាងគ្នានិងគ្នា។
៥. កម្ពុជានៅតែរក្សាជំហរក្នុងការស្វែងរកដំណោះស្រាយលើបញ្ហានេះ ដោយមធ្យោបាយអហិង្សា ឱ្យបានឆាប់រហ័ស ប្រកបដោយភាពច្បាស់លាស់និងចីរភាព។
សូមជម្រាបថា ចាប់តាំងពីមានបញ្ហាព្រំដែនកម្ពុជា-ថៃ សារព័ត៌មានថៃ និងអ្នកនយោបាយថៃ ថ្នាក់ដឹកនាំ ថៃ តែងតែបានប្រើប្រាស់ព័ត៌មានក្លែងក្លាយ ដើម្បីបង្ខូចកិត្តិយស មុខមាត់របស់ប្រទេសកម្ពុជា នៅលើឆាកអន្តរជាតិ។ បញ្ហានេះ ក្រសួងព័ត៌មានកម្ពុជា អះអាងថា នឹងលាតត្រដាងពីគំនិតទុច្ចរិតរបស់សារព័ត៌មានថៃ ដែលប្រើប្រាស់ព័ត៌មានក្លែងក្លាយ ដើម្បីបង្ខូចកិត្តិយសកម្ពុជា លើឆាកអន្តរជាតិចែករំលែកដល់រដ្ឋមន្ត្រីព័ត៌មាន និងអ្នកជំនាញព័ត៌មានមកពីទ្វីបអាស៊ីឱ្យយល់ច្បាស់ផងដែរ៕
