ភ្នំពេញ ៖ ក្រោយក្លាយជាទីប្រឹក្សារបស់ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា លោកសាស្រ្តាចារ្យបណ្ឌិត Dato’ Sri Tahir សមាជិកក្រុមប្រឹក្សាពិគ្រោះយោបល់ប្រធានាធិបតីនៃសាធារណរដ្ឋឥណ្ឌូនេស៊ី និងជាស្ថាបនិកក្រុមហ៊ុន Mayapada Group បានសន្យាជាមួយសម្តេចថា នឹងចូលរួមចំណែកជួយទ្រទ្រង់ដល់សមាគមអតីតយុទ្ធជនកម្ពុជានៅទូទាំងប្រទេស តាមរយៈការសាងសង់ផ្ទះ និងជីកអណ្តូងទឹក ។
លោក ជា ធីរិទ្ធ អ្នកនាំពាក្យប្រធានព្រឹទ្ធសភា បានឲ្យដឹងក្រោយបញ្ចប់ជំនួបរវាងសម្តេចតេជោ និងសាស្រ្តាចារ្យបណ្ឌិត Dato’ Sri Tahir នៅថ្ងៃ១៦ កក្កដា ថា លោកបណ្ឌិតធ្លាប់ជាទីប្រឹក្សារបស់អតីតប្រធានាធិបតីឥណ្ឌូនេស៊ីលោក ចូកូវីដូដូ និងបច្ចុប្បន្នជាសមាជិកក្រុមប្រឹក្សាពិគ្រោះយោបល់ប្រធានាធិបតីឥណ្ឌូនេស៊ី លោក ប្រាបូវ៉ូ ហើយនៅថ្ងៃ១៦ កក្កដា នេះ លោកក៏បានក្លាយជាទីប្រឹក្សាសម្តេចតេជោថែមទៀត ។
លោក ជា ធីរិទ្ធ បន្តថា«បន្ទាប់ពីក្លាយជាទីប្រឹក្សាសម្តេចហើយលោកសន្យានិងប្តេជ្ញាថា នឹងចូលរូមចំណែកក្នុងការជួយដល់ការអភិវឌ្ឍសេដ្ឋកិច្ច ក៏ដូចជាសង្គមកិច្ចនៅក្នុងព្រះរាជាណាចក្រកម្ពុជា ជាពិសេសការចូលរួមចំណែកជួយដល់អតីតយុទ្ធជនកម្ពុជារបស់យើង តាមការជួយសាងសង់ផ្ទះ និងការជួយជីកអណ្តូងទឹក ដើម្បីធ្វើយ៉ាងណាឲ្យអតីតយុទ្ធជនរបស់កម្ពុជាយើងមានស្ថានភាពរស់នៅបានល្អប្រសើរ»។
សម្តេចតេជោ បានស្វាគមន៍ចំពោះគំនិតផ្តួចផ្តើមរបស់សាស្រ្តាចារ្យបណ្ឌិត Dato’ Sri Tahirក្នុងការចូលរួមចំណែកជួយកសាងផ្ទះ និងជីកអណ្តូងទឹក ព្រោះនេះជាការចង់បានរបស់រាជរដ្ឋាភិបាលកម្ពុជា និងសម្តេចផ្ទាល់ព្រោះសម្តេចគឺជាប្រធានសមាគមអតីតយុទ្ធជនកម្ពុជាស្រាប់ដែលបំណងសម្តេចគឺធ្វើយ៉ាងណាឲ្យជីវភាពរបស់អតីតយុទ្ធជនមានលក្ខណៈល្អប្រសើរ ខណៈយុទ្ធជនមួយចំនួនក៏មិនមានមានផ្ទះសម្បែងល្អស្នាក់នៅផងដែរ ។
សម្តេចតេជោ ក៏សង្ឃឹមថា នៅពេលខាងមុខលោកសាស្រ្តាចារ្យបណ្ឌិត Dato’ Sri Tahirនឹងអញ្ជើញមកបំពេញទស្សនកិច្ចនៅកម្ពុជាម្តងទៀត ដើម្បីទៅពិនិត្យទីតាំងដែលលោកបណ្ឌិតសន្យាជួយសាងសង់ផ្ទះដល់អតីតយុទ្ធជននៅទូទាំងប្រទេស ៕
