ព្រះសីហនុ ៖ លោក ម៉ាង ស៊ីណេត អភិបាលខេត្តព្រះសីហនុ បានកោតសរសើរអាជ្ញាធរ និងសមត្ថកិច្ចពាក់ព័ន្ធ ដែលដឹកនាំគ្រប់គ្រងការនាំចេញ-ចូលប្រេងឥន្ធនៈ ឧស្ម័ន និងបន្លែផ្លែឈើពីប្រទេសថៃ ខណៈកិច្ចការងារផ្លូវទឹកពួកយើងធ្វើបានល្អ ក្នុងនោះដែនសមុទ្រខេត្តព្រះសីហនុ គ្មានកប៉ាល់ដឹកទំនិញ បន្លែ ផ្លែឈើ និងប្រេងឥន្ធនៈពីប្រទេសថៃ ចូលមកនោះទេ ប៉ុន្តែក៏មិនអាចដកដៃក្នុងកិច្ចការងារនេះបានដែរ ពោល «គឺយើងត្រូវតែតាមដានដោយប្រុងប្រយ័ត្នបន្ថែមទៀត»។
អភិបាលខេត្តព្រះសីហនុ លើកឡើងដូចនេះ ក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តព្រះសីហនុ នៅថ្ងៃទី៨ ខែកក្កដា ឆ្នាំ២០២៥ ដោយមានការចូលរួម ពីកងកម្លាំងប្រដាប់អាវុធទាំងបីប្រភេទ អភិបាលក្រុង ស្រុក ប្រធានមន្ទីរអង្គភាពពាក់ព័ន្ធ និងមន្ត្រីជាច្រើនរូបទៀត នៅសាលប្រជុំសាលាខេត្តព្រះសីហនុ។
ក្នុងឱកាសនេះ លោក ម៉ាង ស៊ីណេត បានដាក់បទបញ្ជាកងកម្លាំងទាំងនៅលើគោក និងនៅលើទឹក ត្រូវចេញល្បាតដើម្បីពង្រឹងការនាំចេញ-ចូលទំនិញ បន្លែ ផ្លៃឈើ ជាពិសេសប្រេងឥន្ធនៈពីប្រទេសថៃ។
កងកម្លាំងផ្លូវទឹកត្រូវល្បាតលើលំហសមុទ្រ និងតាមកំពង់ផែ ចំណែកនៅលើផ្លូវគោក ប៉ូលិស និងកងរាជអាវុធហត្ថ រួមទាំងអាជ្ញាធរ ត្រូវជួយតាមដាននៅតាមច្រក ដូចជានៅទំនប់រលកមានផែ មានផ្ទះប្រជាពលរដ្ឋច្រើន ដែលជាគោលដៅអាចនាំចូលប្រេងឥន្ធនៈតាមពីដុងបាន។
អភិបាលខេត្ត បានគូសបញ្ជាក់ថា ប្រសិនបើឱ្យមានការនាំចូលសេរីតាមរយៈទូក ២០ទៅ៣០កាន នោះអាចនឹងនាំចូលជាហូហែរ ដោយឡែក តំបន់កោះខ្យង កោះរ៉ុង និងតំបន់ត្រពាំងល្ពៅ ក្នុងស្រុកព្រៃនប់ ក៏ត្រូវតាមដានដែរ ព្រោះជាគោលដៅដែលអាចនាំចេញ-ចូលបាន។
លោកបានសង្កត់ធ្ងន់ថា ក្នុងពេលវេលានេះដាច់ខាត មិនត្រូវអនុញ្ញាតឱ្យមានការនាំចូលពីប្រទេសថៃ ទោះជាមានអ្នកអន្តរាគមន៍ក៏ដោយ ប្រសិនបើមានអ្នកអន្តរាគមន៍ ត្រូវចាប់អ្នកនោះ មកអនុវត្តន៍ច្បាប់យ៉ាងតឹងរ៉ឹង ដូច្នេះត្រូវសហការគ្នាតាមដានដោយប្រុងប្រយ័ត្ន៕
