ស្ទឹងត្រែង ៖ អភិបាលខេត្តស្ទឹងត្រែង លោក សរ សុពុត្រា បានព្រមានចាត់វិធានការច្បាប់ និងបានហាមបញ្ឈប់ជាបន្ទាន់ ចំពោះជនខិលខូចទាំងឡាយណា ដែលបានសមគំនិត ជាមួយអ្នកប្រព្រឹត្តបទល្មើសនេសាទ ផ្ទុយពីច្បាប់ហាមឃាត់ ខណៈដែលជនល្មើសមួយចំនួនត្រូវបានចាប់ខ្លួន និងបញ្ជូនទៅតុលាការអនុវត្តច្បាប់រួចមកហើយ ស្របពេលដែលរាជរដ្ឋាភិបាលបាននិងកំពុងផ្តល់សិទ្ធិអាទិភាពលើការផ្គត់ផ្គង់ធនធានជលផលក្នុងប្រទេស ប្រកបដោយចិរភាព និងសំបូរបែបឡើងវិញ។
ការព្រមានចាត់វិធានការច្បាប់ ចំពោះជនខិលខូចដែលនៅតែបន្តសមគំនិត ជាមួយអ្នកប្រព្រឹត្តបទល្មើសនេសាទ លើដែនដីរដ្ឋបាលខេត្ត នាថ្ងៃទី១ ខែកក្កដា ឆ្នាំ២០២៥ ក្នុងឱកាស លោកអភិបាលខេត្ត អញ្ជើញជាអធិបតីភាពក្នុងពិធីលែងកូនត្រី និងត្រីមេពូជចម្រុះប្រមាណជាង១០ម៉ឺនក្បាល ដើម្បីអបអរទិវាមច្ឆជាតិ ១ កក្កដា នៅទំនប់វារីអគ្គិសនីសេសានក្រោម២ ស្ថិតនៅក្នុងភូមិភ្លុក ឃុំភ្លុក ស្រុកសេសាន ខេត្តស្ទឹងត្រែង។
ថ្លែងក្នុងពិធី លោក អភិបាលខេត្តស្ទឹងត្រែង បានគូសបញ្ជាក់ថា ផ្អែកលើយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ជាពិសេសកម្មវិធី គោលនយោបាយអាទិភាពទី៥ និងទី៦ សំដៅជំរុញការអភិវឌ្ឍវិស័យកសិកម្ម ដែលរួមមានការលើកស្ទួយផលិតកម្ម ការរកទីផ្សារ និងរក្សាលំនឹងថ្លៃកសិផល ការដាក់ពង្រាយមន្ត្រីកសិកម្មឃុំ និងការអភិវឌ្ឍសហគមន៍កសិកម្មទំនើប។
ក្នុងនោះ លោក បានថ្លែងកោតសរសើរ និងវាយតម្លៃខ្ពស់ ចំពោះការចូលរួមរបស់អង្គភាព ពាក់ព័ន្ធ ពិសេសមន្ទីរ កសិកម្ម រុក្ខាប្រមាញ់ និង នេសាទខេត្តស្ទឹងត្រែង ដែលមានខណ្ឌរដ្ឋបាលជលផល ជាសេនាធិការ និងអាជ្ញាធរមានសមត្ថកិច្ច ដែលបានចូលរួមសហការគ្នាយ៉ាងជិតស្និទ្ធក្នុងស្មារតីរួមគ្នា ដើម្បីសម្រេចគោលដៅ ក្នុងការទប់ស្កាត់ និងបង្ក្រាបការ បទល្មើសនេសាទដែលមានលក្ខណៈបំផ្លិចបំផ្លាញធ្ងន់ធ្ងរ សំដៅពង្រឹងការគ្រប់គ្រង និងការអភិរក្សធនធានជលផលធម្មជាតិ៕
