យោងតាមការចុះផ្សាយរបស់សាព័ត៌មាន VN Express នៅថ្ងៃពុធ ទី៨ ខែមករា ឆ្នាំ២០២៥ គុណភាពខ្យល់ (AQI) នៅក្នុងទីក្រុងហាណូយ បានឈានដល់កម្រិតគ្រោះថ្នាក់ពី១០១ ទៅ២០០ នៅថ្ងៃអង្គារ និងឈានដល់កម្រិតគ្រោះថ្នាក់ធ្ងន់ធ្ងរពី ២០១ ទៅ៣០០ នៅថ្ងៃពុធ ដែលបណ្តាលឲ្យប៉ះពាល់ដល់សុខភាពមនុស្សធ្ងន់ធ្ងរ។
ក្រសួងសុខាភិបាលវៀតណាម ណែនាំឲ្យប្រជាជនក្រុងហាណូយ សូមកុំចេញក្រៅផ្តេសផ្តាស ឬលុបចោលកម្មវិធីនៅខាងក្រៅដោយប្តូរមកធ្វើនៅក្នុងកន្លែងបិទជិតវិញ ហើយពាក់ម៉ាសបើចាំបាច់ចេញទៅក្រៅ ឬងាកមកប្រើមធ្យោបាយធ្វើដំណើរសាធារណៈវិញ បើសិនជាអាច។ ព្រោះពេលនេះគុណភាពខ្យល់បានធ្លាក់ដល់កម្រិតគ្រោះថ្នាក់បំផុត។
តាមធម្មតាខ្យល់ដែលមានគុណភាពល្អគឺនៅត្រឹមឬក្រោម ១០០ កាលណាបើឡើងលើស១០០ហើយនោះ គឺចាត់ទុកថា វាគ្មានសុវត្ថិភាព ឬមានគ្រោះថ្នាក់ប៉ះពាល់ខ្លាំងដល់សុខភាពមនុស្ស ជាពិសេសចំពោះផ្លូវដង្ហើម។
អាជ្ញាធរប្រកាសថា មូលហេតុទីក្រុងហាណូយ មានផ្សែងអ័ព្ទក្រាស់ និងខ្យល់ពុលគ្រោះថ្នាក់បែបនេះ គឺដោយសារបម្រែបម្រួលអាកាសធាតុ និងការហប់ខ្យល់ ធ្វើឲ្យកំហាប់ភាគល្អិត និងធូលី មិនបែកខ្ញែក កត្តានេះក៏បណ្តាលមកពីផ្សែងយានយន្ត រោងចក្រ ការដុតកាកសំណល់ ចំបើង និងផលកសិកម្មនៅតាមវាលស្រែចម្ការ។
សូមបញ្ជាក់ថា គុណភាពខ្យល់ទីក្រុងហាណូយ បានវិវត្តន៍ទៅរកស្ថានភាពកាន់តែអាក្រក់ក្នុងខែតុលា ឆ្នាំ២០២៤ ដោយក្រសួងបានណែនាំឲ្យបនរជាជនបិទទ្វារ ឬបង្អួចពេលមានការបំពុលខ្លាំង លាងសម្អាតច្រមុះ ឬលាងភ្នែកបន្ទាប់ពីចេញទៅខាងក្រៅ៕