ប្អូនស្រីរបស់មេដឹកនាំកូរ៉េខាងជើងលោក Kim Jong Un បានបដិសេធការអះអាងរបស់កូរ៉េខាងត្បូងដែលថាទីក្រុងព្យុងយ៉ាងបានដកឧបករណ៍បំពងសំឡេងមួយចំនួននៅតាមព្រំដែន។
លោកស្រី Kim Yo Jong ដែលជាប្អូនស្រីលោក Kim Jong Un បាននិយាយនៅក្នុងសេចក្តីថ្លែងការណ៍មួយចេញផ្សាយដោយប្រព័ន្ធផ្សព្វផ្សាយរដ្ឋ KCNA កាលពីថ្ងៃព្រហស្បតិ៍ថាប្រទេសកូរ៉េខាងជើង “មិនដែលដក” ឧបករណ៍បំពងសម្លេងទេហើយក៏ “មិនមានឆន្ទៈក្នុងការដកវាចេញដែរ” ។
លោកស្រីបាននិយាយថា “យើងបានបំភ្លឺជាច្រើនដងមកហើយថា យើងមិនមានឆន្ទៈក្នុងការធ្វើឱ្យទំនាក់ទំនងឱ្យប្រសើរឡើងជាមួយកូរ៉េខាងត្បូងឡើយ” ដោយបន្ថែមទៀតថាជំហរនេះ “នឹងត្រូវបានដាក់ចូលឬបន្ថែមនៅក្នុងរដ្ឋធម្មនុញ្ញរបស់យើងនាពេលអនាគត” ។
យោធាកូរ៉េខាងត្បូងបាននិយាយនៅដើមសប្តាហ៍នេះថា កូរ៉េខាងជើងបានដកឧបករណ៍បំពងសំឡេងមួយចំនួនរបស់ខ្លួននៅតាមព្រំដែនដែលប៉ុន្មានថ្ងៃបន្ទាប់មកកូរ៉េខាងត្បូងក៏បានរុះរើឧបករណ៍មួយចំនួនរបស់ខ្លួនផងដែរ។
ប្រភព: BBC news
