ប្រធានាធិបតីអាមេរិក លោក ដូណាល់ ត្រាំ បានចេញបទបញ្ជាប្រតិបត្តិមួយ ដោយបន្ថែមពន្ធលើប្រទេសឥណ្ឌា ២៥%បន្ថែមទៀត ដោយសារឥណ្ឌាបានទិញប្រេងពីរុស្ស៊ីដែលអាមេរិកហាមឃាត់។ ការដំឡើងពន្ធនេះមានន័យថាពន្ធសរុបលើទំនិញនាំចូលពីឥណ្ឌាទៅកាន់សហរដ្ឋអាមេរិកកើនដល់៥០%ដែលជាអត្រាខ្ពស់បំផុត។
អត្រាពន្ធថ្មីនេះនឹងចូលជាធរមានក្នុងរយៈពេល ២១ ថ្ងៃបន្ទាប់ ដូច្នេះគឺត្រូវអនុវត្តនៅថ្ងៃទី ២៧ ខែសីហា នេះបើតាមបញ្ជាប្រតិបត្តិ។
ចំណែកឯការឆ្លើយតបពីក្រសួងការបរទេសរបស់ប្រទេសឥណ្ឌាកាលពីថ្ងៃពុធទី៦ សីហាបាននិយាយថា ទីក្រុងដេលីបានបញ្ជាក់យ៉ាងច្បាស់រួចហើយនូវគោលជំហររបស់ខ្លួនលើការនាំចូលពីប្រទេសរុស្ស៊ី ហើយបានរំលឹកឡើងវិញថាពន្ធគយនេះគឺ “អយុត្តិធម៌ មិនតម្លាភាព និងមិនសមហេតុផល”។
សូមបន្ថែមឲ្យដឹងដែរថា រុស្ស៊ីជាអ្នកនាំចេញប្រេងនិងឧស្ម័នធំជាងគេបំផុត ហើយអតិថិជនដ៏ធំនិងសំខាន់របស់ក្រុងម៉ូស្គូរួមមានប្រទេសចិន ឥណ្ឌា និងតួកគី។ ទិន្នន័យពាណិជ្ជកម្មបានបង្ហាញថា ឥណ្ឌាបានទិញប្រេងពីរុស្ស៊ីប្រហែល ១.៧៥ លានបារ៉ែលក្នុងមួយថ្ងៃក្នុងរយៈពេលប្រាំមួយខែដំបូងនៃឆ្នាំនេះ នេះបើយោងតាមទីភ្នាក់ងារសារព័ត៌មាន Reuters។
ប្រភព: BBC news
