អង្គការសហប្រជាជាតិ៖ ប្រធានាធិបតីអាមេរិក លោក ដូណាល់ ត្រាំ បានបញ្ជាក់យ៉ាងច្បាស់ថា លោកចង់បានកិច្ចព្រមព្រៀងមួយ ដើម្បីបញ្ចប់សង្គ្រាមរវាងរុស្ស៊ីនិងអ៊ុយក្រែន ត្រឹមថ្ងៃទី ៨ ខែសីហា។
អ្នកការទូតជាន់ខ្ពស់អាមេរិក លោក John Kelley បានប្រាប់ក្រុមប្រឹក្សាសន្តិសុខអង្គការសហប្រជាជាតិដែលមានសមាជិកទាំង ១៥ប្រទេសថា “ទាំងរុស្ស៊ី និងអ៊ុយក្រែន ត្រូវតែចរចាបទឈប់បាញ់ និងមានសន្តិភាពយូរអង្វែង។ វាដល់ពេលដែលត្រូវធ្វើកិច្ចព្រមព្រៀងហើយ”។
លោកត្រាំ បាននិយាយកាលពីថ្ងៃអង្គារ៍ថា សហរដ្ឋអាមេរិកនឹងចាប់ផ្តើមដាក់ពន្ធគយ និងវិធានការផ្សេងទៀតលើប្រទេសរុស្ស៊ី “១០ ថ្ងៃចាប់ពីថ្ងៃនេះតទៅ” ប្រសិនបើទីក្រុងមូស្គូមិនបង្ហាញពីវឌ្ឍនភាពឆ្ពោះទៅរកការបញ្ចប់សង្រ្គាមរបស់ខ្លួននៅអ៊ុយក្រែន។
ក្រុងគៀវនិងក្រុងមូស្គូបានធ្វើការចរចាចំនួនបីលើកមកហើយក្នុងទីក្រុងអ៊ីស្តង់ប៊ុលក្នុងឆ្នាំនេះ ដែលបានផ្តល់នូវការដោះដូរអ្នកទោស និងសាកសព ប៉ុន្តែគ្មានដំណោះស្រាយដើម្បីដោះស្រាយជម្លោះជាងបីឆ្នាំនោះទេ។
ប្រភព: CNA
