ម៉ានីល៖ ដោយភ្លៀងធ្លាក់ខ្លាំងបណ្តាលឱ្យមានទឹកជំនន់ ធ្វើឱ្យសកម្មភាពប្រចាំថ្ងៃនៅរដ្ឋធានីហ្វីលីពីនត្រូវផ្អាកនៅថ្ងៃអង្គារ ទី២២ខែកក្កដា ដោយមនុស្សរាប់ម៉ឺននាក់ត្រូវបានជម្លៀសចេញពីផ្ទះរបស់ពួកគេ ហើយយ៉ាងហោចណាស់មានមនុស្សពីរនាក់ត្រូវបានបាត់ខ្លួន។
សាលារៀន និងការិយាល័យរដ្ឋាភិបាលក្នុងទីក្រុងម៉ានីល និងខេត្តជុំវិញត្រូវបានផ្អាកបន្ទាប់ពីភ្លៀងមួយយប់ដែលបណ្តាលឲ្យទន្លេ Marikina នៅតំបន់នោះបានបាក់ច្រាំង។
មនុស្សជាង២៣,០០០ នាក់ដែលរស់នៅតាមដងទន្លេត្រូវបានជម្លៀសចេញពេញមួយយប់ ដោយបានជ្រកកោននៅក្នុងសាលារៀន និងទីធ្លាសាធារណៈនៅជិតៗនោះ។
ចំណែកមនុស្ស ២៥,០០០ នាក់ផ្សេងទៀតត្រូវបានជម្លៀសចេញពីទីក្រុង Quezon និង Caloocan ។
សូមបន្ថែមឲ្យដឹងដែរថា ទឹកជំនន់បានស្រកចុះវិញនៅព្រឹកថ្ងៃអង្គារទី២២ កក្កដានេះ តែមនុស្សរាប់ពាន់នាក់នៅតែមិនទាន់អាចត្រឡប់ទៅផ្ទះរបស់ពួកគេបានវិញនៅឡើយ។
ប្រភព: CNA news
