DHAKA: មន្ត្រីរដ្ឋាភិបាលមួយរូបបាននិយាយនៅថ្ងៃអង្គារ៍ទី២២ខែកក្កដានេះថា មានស្លាប់មនុស្សយ៉ាងហោចណាស់ ២៧ នាក់ ដែលភាគច្រើនជាកុមារ បន្ទាប់ពីយន្តហោះចម្បាំងរបស់បង់ក្លាដែសបានធ្លាក់លើសាលារៀនមួយក្នុងរដ្ឋធានីដាកា។
ជនរងគ្រោះភាគច្រើនជាសិស្សសាលា នៅពេលដែលយន្តហោះ F-7 BJJ ផលិតនៅប្រទេសចិន បានបុកចូលសាលានិងមហាវិទ្យាល័យ Milestone កាលពីថ្ងៃចន្ទទី២១ កក្កដា។
លោក Sayedur Rahman ជំនួយការទីប្រឹក្សាក្រសួងសុខាភិបាល និងសុខុមាលភាពគ្រួសារបាននិយាយថា “រហូតមកដល់ពេលនេះមានមនុស្ស ២៧ នាក់បានស្លាប់។ ហើយក្នុងចំណោមអ្នកស្លាប់មាន២៥នាក់ជាកុមារ និងម្នាក់ជាអ្នកបើកបរយន្តហោះ” ។
លោក Rahman បានបន្ថែមថា “មនុស្សចំនួន ៧៨នាក់ទៀតកំពុងព្យាបាលនៅក្នុងមន្ទីរពេទ្យផ្សេងៗគ្នា” ។
នៅក្នុងសេចក្តីថ្លែងការណ៍មួយបាននិយាយថា “មូលហេតុពិតប្រាកដនៃគ្រោះថ្នាក់នេះកំពុងតែស្ថិតក្រោមការស៊ើបអង្កេត”។
ប្រភព:CNA news
