GAZA: វេជ្ជបណ្ឌិតនៅមន្ទីរពេទ្យដ៏ធំជាងគេរបស់តំបន់ Gazaបាននិយាយថាកង្វះខាតប្រេងឥន្ធនៈបានធ្វើឲ្យពួកគេបង្ខំចិត្តដាក់ទារកមិនគ្រប់ខែជាច្រើននាក់នៅក្នុងកែវចិញ្ចឹមតែមួយ ខណៈដែលគ្រូពេទ្យបានតស៊ូដើម្បីរក្សាជិវិតទារកទើបនឹងកើតទាំងនេះ ក្នុងពេលដែលអ៊ីស្រាអែលនៅតែបន្តយុទ្ធនាការយោធារបស់ខ្លួន។
ក្រុមគ្រូពេទ្យបាននិយាយថាការផ្គត់ផ្គង់ប្រេងឥន្ធនៈត្រូវបានធ្លាក់ចុះដែលវាបានគំរាមកំហែងដល់មន្ទីរពេទ្យនិងគ្លីនិកនានាចាប់ផ្តើមខ្វះឋាមពលអគ្គិសនី និងងងឹត។
មន្ត្រីយោធាអ៊ីស្រាអែលម្នាក់បាននិយាយថា ប្រេងឥន្ធនៈប្រហែល ១៦០,០០០ លីត្រ ( ១៦មុឺនលីត្រ)សម្រាប់មន្ទីរពេទ្យ និងកន្លែងមនុស្សធម៌ផ្សេងៗបានដឹកចូលទៅដល់តំបន់Gazaតាំងពីថ្ងៃពុធទី10ខែកក្កដាមកម្ល៉េះក៏ប៉ុន្តែការចែកចាយប្រេងនៅជុំវិញតំបន់នោះមិនស្ថិតនៅក្រោមកាទទួលខុសត្រូវរបស់អ៊ីស្រាអែលទេ។
វេជ្ជបណ្ឌិតនៅទីនោះបាននិយាយថា ខណៈពេលដែលនាយករដ្ឋមន្ត្រីលោក Benjamin Netanyahu កំពុងពិភាក្សាអំពីជោគវាសនារបស់ចំណាប់ខ្មាំងអ៊ីស្រាអែលនៅតំបន់ Gaza ជាមួយប្រធានាធិបតីអាមេរិក លោកត្រាំនៅទីក្រុងវ៉ាស៊ីនតោនក្នុងសប្តាហ៍នេះ អ្នកជំងឺនៅមជ្ឈមណ្ឌលវេជ្ជសាស្ត្រ Al Shifa ក្នុងទីក្រុង Gaza បានប្រឈមមុខនឹងគ្រោះថ្នាក់ដល់ជីវិត។
