ហ្វីលីពីន ៖ លោក ហ្វើឌីណាន់ ម៉ាកូស ប្រធានាធិបតី ហ្វីលីពីន នៅថ្ងៃចន្ទទី១១ ខែវិច្ឆិកានេះ បានចុះហត្ថលេខាលើច្បាប់ ស្ដីពីការកាត់បន្ថយអត្រាពន្ធលើប្រាក់ចំណូលសាជីវកម្ម និងផ្តល់ការលើកទឹកចិត្តសារពើពន្ធបន្ថែមទៀតដល់ក្រុមហ៊ុនដែលមានសមត្ថភាព ក្នុងគោលបំណងទាក់ទាញអ្នកវិនិយោគបរទេស ឱ្យធ្វើអាជីវកម្មនៅក្នុងប្រទេស។
ថ្វីត្បិតតែជាប្រទេសដែលមានសេដ្ឋកិច្ចលូតលាស់លឿនមួយរបស់អាស៊ីក៏ដោយ ក៏ហ្វីលីពីនមានភាពយឺតយ៉ាវ ក្នុងតំបន់ ក្នុងការទាក់ទាញការវិនិយោគផ្ទាល់ពីបរទេស ដោយសារការរឹតបន្តឹងកម្មសិទ្ធិបរទេស ថ្លៃថាមពលខ្ពស់ និងហេដ្ឋារចនាសម្ព័ន្ធមិនល្អ។
ទិន្នន័យរបស់អង្គការសហប្រជាជាតិ បានបង្ហាញលំហូរការវិនិយោគផ្ទាល់ពីបរទេសរបស់ហ្វីលីពីន កាលពីឆ្នាំមុន មានចំនួន ៦.២ពាន់លានដុល្លារ តិចជាងបើធៀបនឹងសិង្ហបុរី ១៥៩.៧ពាន់លានដុល្លារ ឥណ្ឌូនេស៊ី ២១.៦ពាន់លានដុល្លារ និងវៀតណាម ១៨.៥ពាន់។
ការងើបឡើងវិញសាជីវកម្ម និងការលើកទឹកចិត្តពន្ធសម្រាប់សហគ្រាស ដើម្បីបង្កើនឱកាសសម្រាប់ការស្តារសេដ្ឋកិច្ចឡើងវិញ ច្បាប់នេះកាត់បន្ថយអត្រាពន្ធលើប្រាក់ចំណូលរបស់សហគ្រាសអាជីវកម្ម ដែលបានចុះបញ្ជី មកត្រឹម ២០% គឺចុះពី ២៥%។
វិធានការនេះអនុញ្ញាតឱ្យសហគ្រាសអាជីវកម្មដែលបានចុះបញ្ជី ឬក្រុមហ៊ុនដែលបានចុះបញ្ជី ជាមួយភ្នាក់ងារជំរុញការវិនិយោគ ទទួលបានអត្ថប្រយោជន៍ពីការបន្ថយពន្ធរួមទាំងការកាត់បន្ថយពន្ធបន្ថែម ១០០% សម្រាប់ការចំណាយថាមពល ដើម្បីជួយក្រុមហ៊ុនទប់ទល់នឹងតម្លៃថាមពលខ្ពស់នៅក្នុងប្រទេសហ្វីលីពីន។
វាជាការពង្រីកអត្ថប្រយោជន៍ពន្ធ សម្រាប់ការវិនិយោគជាយុទ្ធសាស្រ្ត ពី១៧ឆ្នាំរហូតដល់២៧ឆ្នាំ និងបញ្ជាក់ពីការលើកលែង ដែលក្រុមហ៊ុនអាចទាមទារ សម្រាប់ពន្ធលើការលក់។ វាក៏ផ្តល់ប្រាក់ឧបត្ថម្ភដល់និយោជិតរហូតដល់ ៥០% សម្រាប់សហគ្រាសអាជីវកម្មដែលបានចុះបញ្ជី។
ហ្វីលីពីនព្យាករណ៍ថា នឹងបាត់បង់ប្រាក់ចំណូលពន្ធចំនួន ៥.៩ ពាន់លានប៉េសូ ( ស្មើនឹង១០០.៨៩ លានដុល្លារ ) ពីច្បាប់ថ្មី ចាប់ពីឆ្នាំ២០២៥ដល់ឆ្នាំ២០២៨ នេះបើយោងតាមឯកសារដែលរៀបចំដោយការិយាល័យទំនាក់ទំនងរបស់ ប្រធានាធិបតី៕