ស្នងការដ្ឋាននគរបាលរាជធានី បញ្ជាជំនាញ និងអធិការដ្ឋាននគរបាលខណ្ឌទាំង១៤ ចុះផ្សព្វផ្សាយអប់រំ ដោយមិនអនុញ្ញាតឲ្យលក់ផាវ និងកាំជ្រួចនោះទេ ដើម្បីរក្សាបាននូវសន្តិសុខ សុវត្ថិភាព ក្នុងឱកាសបុណ្យចូលឆ្នាំថ្មី ប្រពៃណីចិន និងវៀតណាម ដែលនឹងប្រព្រឹត្តទៅចាប់ពីថ្ងៃទី ២៨ ដល់ថ្ងៃទី ៣១ ខែមករា ឆ្នាំ ២០២៥ ខាងមុខនេះ។
ជាក់ស្ដែងកាលពីព្រឹកថ្ងៃទី ២០ ខែមករា ឆ្នាំ ២០២៥ ម្សិលមិញ លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានអញ្ជើញដឹកនាំកិច្ចប្រជុំផ្សព្វផ្សាយផែនការការពារសន្តិសុខ រក្សាសណ្ដាប់ធ្នាប់ សុវត្ថិភាព ថ្ងៃបុណ្យចូលឆ្នាំថ្មី ប្រពៃណីជនជាតិចិន និងវៀតណាម។
កិច្ចប្រជុំបានដាក់ចេញនូវគោលការណ៍ឲ្យជំនាញ និងអធិការដ្ឋាននគរបាលខណ្ឌទាំង ១៤ សហការចុះផ្សព្វផ្សាយអប់រំដល់កន្លែងលក់ផាវ និងកាំជ្រួច។ ក្នុងនោះ មិនអនុញ្ញាតឲ្យលក់ផាវ និងកាំជ្រួចនោះទេ ករណីរកឃើញមានការដឹកជញ្ជូនផាវកាំជ្រួច ត្រូវចាប់ឃាត់ទុក។ ណែនាំមិនអនុញ្ញាតឲ្យមានការដុតផាវ ដុតកាំជ្រួច ដែលមានហានិភ័យបង្កគ្រោះថ្នាក់ជាយថាហេតុណាមួយ។
ស្នងការដ្ឋាននគរបាលរាជធានី ក៏បានបញ្ជាដល់អាជ្ញាធរមានសមត្ថកិច្ចគ្រប់ថ្នាក់ ត្រូវចាត់វិធានការឲ្យម៉ឺងម៉ាត់បំផុត កុំឲ្យមានការនាំចូលផាវ, កាំជ្រួច, ជាតិផ្ទុះគ្រប់ប្រភេទ តាមច្រកចូលរាជធានីភ្នំពេញ និងត្រូវត្រួតពិនិត្យដកហូតវត្ថុទាំងនេះ ដែលមានតាំងលក់នៅគ្រប់ទីកន្លែង ក្នុងរាជធានីភ្នំពេញ។ បន្ថែមនោះ អធិការដ្ឋាននគរបាលខណ្ឌទាំង ១៤ ត្រូវផ្សព្វផ្សាយណែនាំដល់មន្ត្រីរាជការ កងកម្លាំងក្រោមឱវាទ និងប្រជាពលរដ្ឋក្នុងមូលដ្ឋាន ឲ្យអនុវត្តតាមការណែនាំនេះ ឲ្យមានប្រសិទ្ធភាព។
ស្នងការដ្ឋាននគរបាលរាជធានីភ្នំពេញ នឹងអនុវត្តទៅតាមផ្លូវច្បាប់ចំពោះជនណាបំពាន ឬប្រព្រឹត្តល្មើស បង្កឲ្យមានចលាចលក្នុងសង្គម សន្តិសុខ សុវត្ថិភាព និងរបៀបរៀបរយសាធារណៈ ត្រូវទទួលទោសតាមច្បាប់ជាធរមាន។
ស្នងការដ្ឋាននគរបាលរាជធានីភ្នំពេញ ក៏បានបង្ហាញលេខទូរស័ព្ទទាន់ហេតុការណ៍ ២៤ ម៉ោង/២៤ម៉ោង របស់ក្រុមប្រចាំបញ្ជា នៃស្នងការដ្ឋាននគរ បាលរាជធានីភ្នំពេញ ០១២ ៩៩៩ ៩៩៩ និង ការិយាល័យនគរបាលបង្ការពន្លត់អគ្គិភ័យ និងសង្គ្រោះ ៦៦៦, ០៩៧ ៧៣៣ ៣៣ ៥៥៕